Galicia gaña poboación por primeira vez en 10 anos

Esta recuperación débese a que as persoas estranxeiras increméntanse en máis de 11.000 (+11%), a maior alza entre comunidades
Dous anciáns paseando por un parque
photo_camera Dous anciáns paseando por un parque

A poboación de Galicia creceu en 770 habitantes en 2019, ata volver superar os 2,7 millóns de persoas, no que supón o primeiro aumento de habitantes nunha década.

Así figura nos datos do padrón a data de 1 de xaneiro de 2020 que publica este martes o Instituto Nacional de Estadística (INE), que arroxa que Galicia conta cun total de 2.700.629 habitantes. A 1 de xaneiro de 2019 baixouse dos 2,7 millóns.

Pese ao descenso da natalidade, este aumento da poboación débese a que Galicia é a comunidade na que máis creceu a poboación estranxeira en 2019 (+11,1%), por encima de Navarra e País Vasco (+9,7% en ambas).

No primeiro incremento do padrón en Galicia desde o 1 de xaneiro de 2010, obsérvase que a poboación estranxeira aumentou en 11.154 persoas respecto dun ano antes, ata situarse nun total de 112.022. As principais nacionalidades inscritas son Portugal (14.739), Venezuela (12.622), Brasil (9.367), Colombia (8.242) e Romanía (8.057 habitantes).

O Goberno galego destaca nun comunicado que este incremento "indica que cada vez máis persoas deciden vir vivir a Galicia desde outros países"

Aínda así, o peso da poboación estranxeira en Galicia é o segundo máis baixo de toda España, pois supón o 4,1%, só por encima do caso de Estremadura (o 3,2%). A media española é do 11,4%.

A este respecto, o Goberno galego destaca nun comunicado que este incremento "indica que cada vez máis persoas deciden vir a vivir a Galicia desde outros países", xa sexa "porque retornan a Galicia ou ben porque deciden instalarse por primeira vez na comunidade".

MUNICIPIOS. Este padrón continuo tamén mostra que entre os 313 municipios galegos, hai 36 concellos de menos de 1.000 habitantes. Os que teñen entre 1.000 e 10.000 habitantes son a maioría, 221. No tramo de 10.000 a 50.000 persoas figuran 49. Os de máis de 50.000 son sete municipios.

De tal forma, a maior parte da poboación, o 34%, vive nos municipios de 10.000 a 50.000 habitantes. O 24,1% dos habitantes están nas tres cidades de máis de 100.000 habitantes -Vigo, A Coruña e Ourense-.

Comentarios