Galicia inicia este venres unha nova fase da desescalada con todos os indicadores á baixa, tanto de casos activos, como de contaxios novos, de presión hospitalaria e de incidencia acumulada.
Segundo os datos do Servizo Galego de Saúde, ata as 18 horas do xoves había en Galicia 6.273 casos activos (-499) e producíronse 272 contagios en 24 horas, polo que os novos casos volven caer (-48).
Nos hospitais, hai tamén un novo descenso con 22 persoas menos ingresadas, 4 delas nas unidades de críticos, e deixa o número total en 564 persoas, 117 delas na UCI.
Desde o inicio da pandemia contaxiáronse en Galicia 112.038 persoas e curáronse 103.569 persoas; mentres que as oito mortes comunicadas este xoves pola administración elevan o número de falecidos a 2.213 persoas.
Durante a última xornada realizáronse 6.980 probas PCR, cunha taxa de positividade do 3,8 %, o que supón que en total se fixeron 1.654.676 probas deste tipo e outras 739.625 serológicas.
Por áreas sanitarias, A Coruña continúa á cabeza con 2.019 casos activos (-166) e 70 novos positivos por PCR (-6); seguida por Vigo, que conseguiu baixar de mil casos activos (994), 54 menos, tras 65 positivos por PCR (3 máis).
Pontevedra tamén continúa co descenso de casos activos, ata os 884 (-46), a pesar de 28 novos positivos por PCR (-11).
As áreas de Lugo con 631 casos activos (-71); Santiago, 694 (-48); e Ferrol, 665 (-54) tamén seguen reducindo os casos activos de modo sostido, mentres que a área de Ourense xa baixou de 400 casos activos, 386 (-52).
