As unidades de críticos galegas marcaron este luns unha nova marca, con 254 persoas ingresadas por covid-19, seis máis que o domingo e unha máis que o 2 de febreiro —data que marcara o pico anterior—, a pesar de que segue o descenso de casos activos e de novos contaxios.
Os datos publicados pola Consellería de Sanidade reflicten que esta subida nas Ucis vai acompañada dun incremento en planta, con 37 persoas máis, ata as 1.063, todo iso nunha xornada na que volveron a descender de xeito notable os casos activos, 720 menos, ata
Tamén descenderon os contaxios nun día, que caen aos 525, similares aos que se detectaban a comezos de xaneiro, segundo o último parte actualizado do Servizo Galego de Saúde (Sergas) ata as 18 horas do domingo.
Sanidade notificou nas últimas horas 17 novos falecementos, o que eleva o saldo mortal a 1.967 mortes atribuídas á pandemia en Galicia.
A cifra acumulada de contaxios por covid-19 en Galicia sitúase nos 104.701, e a de curados, en 83.504. O Sergas realizou 11.772 probas PCR, 101 menos que o día anterior, cunha taxa de positividade do 4,1%, e ademais 11.019 test de antíxenos, tres mil menos.
Desde o inicio da urxencia sanitaria realizáronse en Galicia 1.509.268 probas PCR e 621.309 serolóxicas.
Por áreas sanitarias, todas reducen o número de casos activos e tamén de casos positivos por PCR. A área da Coruña segue á cabeza en casos activos, con 5.161 (-158), tras sumar 166 casos novos (98 menos); seguida da área de >Vigo, con 3.146 casos activos (323 menos) e 74 novos contagios por PCR (-67).
Tamén baixan os casos activos en Santiago de Compostela, ata os 2.932 (-91) tras 60 PCR positivas (-56); Lugo, con 1.767 casos activos (-96) tras 50 PCR positivas (-38); e Ferrol, con 1.661 casos activos (-33) tras 49 PCR positivas (-6).
Na área de Ourense hai 2.096 casos activos (144 menos), tras 43 PCR positivas (-41) e na área de Pontevedra os casos activos alcanzan os 2.483, unha redución de 43 respecto ao día anterior, tras 48 PCR positivas (-86).
