A Asociación de Educación Ambiental e do Consumidor (Adeac) concedeu 107 bandeiras azuis en praias galegas para 2019, dúas menos que en 2018.
En total, a Consellería de Medio Ambiente destaca que Galicia recibe 163 galardóns, para areais, portos, carreiros e aulas-centros de natureza.
En canto ás praias, son 55 bandeiras azuis para a provincia de Pontevedra, 38 para A Coruña e 14 para Lugo, aos que se suman 12 en portos galegos (fronte aos 15 do ano pasado).
A comunidade galega, mentres, ocupa a primeira posición no número de recoñecementos para carreiros azuis, cun total de 29, dos cales os de Praia de Abrela-Punta Socastro (Fuciño do Porco) e a Ruta Montes e Praias en Marín o reciben por primeira vez.
A Xunta valora que Galicia mantén a súa posición na clasificación estatal con 107 bandeiras para os areais de 31 concellos, aos que se engaden 12 distintivos para portos deportivos e 15 para centros azuis.
Os municipios aos que corresponde o maior número de bandeiras azuis para as súas praias son Boiro, Arteixo, Oleiros e A Coruña (na provincia coruñesa); Foz en Lugo e Sanxenxo en Pontevedra, seguido de Vigo, Cangas, Marín e Baiona.
Abrela (O Vicedo), Samil (Vigo), Loira (Marín) e Panadeira (Sanxenxo) volven obter este distintivo, que non recibiran na pasada edición.
A comunidade galega acapara case un 20% das 566 bandeiras azuis outorgadas a praias españolas, de acordo coa análise de Medio Ambiente.
► Consulta aquí a lista de todas as praias con bandeira azul
As rexións que máis perden son Andalucía (18), Canarias (7) e Cataluña (4), mentres que a que máis gana é a Comunidade Valenciana (3).
Respecto ao número de portos, mantense practicamente estable con Cataluña á cabeza (23), Andalucía (17), Baleares (16), Comunidade Valenciana (15), Galicia (12) e Canarias (6).
