Galicia rastrexará dez depuradoras para detectar o coronavirus de forma temperá

O proxecto céntrase en Melide, Cambados, Moraña, Baiona, Nigrán, Gondomar, Porto do Son, Muros, Ares e Cedeira. Outro estudo rastrexa a presenza do virus en sete estacións diferentes, entre elas as de Viveiro e Lugo
Depuradora de aguas residuales. EP
photo_camera Depuradora de augas residuais. EP

A Xunta, a Universidade de Vigo e o Centro Superior de Investigacións Científicas (CSIC) asinaron un convenio de colaboración para desenvolver un proxecto conxunto de detección temperá do coronavirus en dez depuradoras de augas residuais da comunidade. Formarán parte deste estudo as de Baiona, Nigrán, Gondomar, Cambados, Moraña, Porto do Son, Muros, Melide, Ares e Cedeira, todas elas explotadas por Augas de Galicia.

A detección do coronavirus realizarase mediante técnicas avanzadas e a secuenciación masiva de nova xeración de augas para establecer a presenza do virus a través de feces, augas residuais e bioindicadores mariños. Tomaranse mostras na contorna da vertedura final, río ou mar, con especial atención á detección do virus en especies como o mexillón. Tamén se farán mostras nestes bivalvos, de batea ou de roca, que estean próximos ás saídas das depuradoras.

Os resultados das análises achegarán unha información fundamental sobre o desenvolvemento da pandemia en Galicia e permitirán unha detección temperá de posibles rebrotes, segundo destaca a Xunta.

En maio xa se realizaron análises en varias depuradoras

Os rastrexos en depuradoras comezaron en maio nas instalacións de Cambados, Nigrán e Baiona, seleccionadas en base ao grande incremento de poboación en época estival, como puntos de alerta temperá ante posibles rebrotes asociados a desprazamentos vacacionais. Agora, ao ampliarse o abanico de depuradoras analizadas, a poboación de seguimento pasa a ser de 33.083 persoas a 112.442.

Entre maio e xuño pasados tomáronse nesas tres depuradoras 168 mostras. Os resultados das análises completadas en 77 mostras arroxaron un resultado negativo en canto á presenza de material xenético do coronavirus.

Augas de Galicia tamén forma parte doutro proxecto que se está desenvolvendo xunto coa Universidade de Santiago e as empresas operadoras da auga para rastrexar a presenza do virus nas augas e, sobre todo, nos lodos resultantes dos procesos de depuración. Estoutro estudo implica ás estacións depuradoras de Vigo, Ferrol, Viveiro, Lugo, Ourense, Santiago e Ribeira. 

Comentarios