Galicia rexistrou durante esta noite de San Xoán, concretamente entre as 00.00 e as 8.00 horas, un total de 250 incidencias. A maioría delas debéronse a fogueiras descontroladas, á inxesta excesiva de alcol, a pelexas e a persoas feridas por queimaduras.
Todo iso, explicaron a Europa Press desde a Xunta, requiriu a solicitude de ambulancias e a presenza das forzas da orde e dos Bombeiros nalgúns casos.
En concreto, a cidade que rexistrou máis incidencias foi A Coruña, con 88 incidencias atendidas polos servizos sanitarios e de seguridade, tal e como explicou a concelleira de Medio Ambiente, María García. No entanto, o número de incidencias foi menor que o pasado San Xoán, no que se produciron 131.
A edila asegurou que a situación nas praias, controlada en todo momento, caracterizouse pola tranquilidade e o comportamento "cívico" dos asistentes.
Só 15 persoas foron trasladadas ao Complexo Hospitalario Universitario da Coruña (Chuac), pero ningunha revestía gravidade. O máis destacable da noite foi que os servizos de urxencias tiveron que sacar da auga, ao redor das 6.00 horas, a unha persoa que presentaba un "elevado grao etílico".
Ademais, na cidade herculina, concretamente na Praia das Lapas, unha muller queimouse unha man.
á cidade da Coruña séguelle Vigo, con 21 incidencias, e a localidade de Nigrán, con 10. En concreto, na praia de Samil, en Vigo, unha persoa queimouse ao tratar de saltar unha fogueira.
Pola súa banda, en Padrón producíronse sete incidencias; en Oleiros, seis; e en Santiago, cinco. En concreto, unha persoa cravouse un cravo ao tratar de saltar unha fogueira na Praza do Matadoiro.
En Sanxenxo e Cangas rexistráronse cinco incidencias, mentres que na localidade coruñesa de Arteixo e na pontevedresa de Poio, catro.
Tamén na noite de San Xoán, un coche caeu nas vías do tren en Foz, pero, afortunadamente, ninguén resultou ferido.
Galicia rexistra 250 incidencias en San Xoán, entre inxestas excesivas de alcol e queimaduras
A maior parte dos incidentes producíronse na Coruña, ata un total de 88
