Galicia rexistra este luns 1.207 casos activos por coronavirus, a menor cifra en tres meses, despois de que o pasado 20 de xuño alcanzase o chan da exigua cuarta onda na comunidade, con 1.289 infectados.
Deste xeito continúa o descenso da quinta onda de contagios, que nesta xornada sumou 33 casos novos e deixa a presión asistencial igual que un día antes, con 58 pacientes ingresados por covid-19, 17 deles en unidades de críticos, segundo os datos facilitados polo Servizo Galego de Saúde.
Desde o inicio da pandemia contaxiáronse en Galicia 182.141 persoas, das que se recuperaron 178.339 e faleceron 2.629, ningunha delas nas últimas horas.
Por áreas sanitarias, todas seguen en descenso, coas de Ferrol e de Pontevedra por baixo dos cen casos e as da Coruña, Lugo e Vigo aínda por encima de douscentos.