A poucos días do inicio oficial do verán, os termómetros xa comezan a situarse nos valores propios desta época do ano. Este martes, a calor chegou de forma intensa ao sur da comunidade, onde se chegaron a superar os 35 graos nalgúns puntos. Este mércores, esta situación trasladarase ao terzo norte de Galicia, onde se prevé un aumento das máximas.
Este martes a temperatura máis elevada rexistrouse en Ourense, cidade na que se acadaron os 35,3 graos, por diante dos 35 alcanzados en Areas (Pontevedra).
A calor azoutou intensamente as provincias de Ourense e Pontevedra, pero tamén o sur de Lugo. En puntos da Ribeira Sacra como Sober superáronse os 33 graos.
A previsión de Meteogalicia é que este mércores as máximas continúen en valores altos no sur da comunidade. No terzo norte espérase que as temperaturas experimenten un lixeiro ascenso.
ONDA DE CALOR. Ante este escenario, que se prolongará durante uns días, a Xunta activou o plan de actuación ante unha posible onda de calor, co obxectivo principal de reducir o impacto sobre a saúde da poboación galega.
O Plan establece un sistema de previsión, alerta e comunicación dos riscos, define unha sistemática de intervención para cada nivel de alerta establecido, e reforza a coordinación institucional entre as unidades competentes nesta materia.
Considérase onda de calor cando o índice de sensación térmica é superior, como mínimo, a 24 graos e superior ao percentil 95 dos valores obtidos nos resultados históricos desa zona, e, ademais, con temperaturas mínimas superiores a 20ºC. Así mesmo, estas circunstancias deberán ter continuidade durante dúas ou máis xornadas.
