O Galician Cinema & Food Festival (GC&FF) botou o pano este luns tras cinco días de actividades en Nova York. O evento, que fusiona cine e gastronomía, centro a parte cinematográfica desta edición en Dhogs, a película máis galardoada da historia dos premios do cine galego Mestre Mateo, e na parte gastronómica apostou un ano máis polos produtos de PescadeRías e por chefs galegos da Gran Mazá, neste caso Fran Novas e Rogelio García, chefs corporativos do Restaurante Tomiño, no Soho.
O CG&FF coincidiu un ano máis coa celebración da feira Fancy Food á que acudiron varias empresas galegas como Portomar, Cabo de Penas e O Compás, arroupadas pola Consellería de Mar. Esta coincidencia non é casual e está pensada para aumentar as sinerxías competitivas dos produtos galegos en USA e estas empresas mostraron o seu produto tamén no escaparate que ofrece o GC&FF.
Así, durante os cinco días de duración do GC&FF celebráronse showcookings, catas de viños galegos e a exhibición de Dhogs.
A película proxectouse no auditorio de Instituto Cervantes para un público maiormente norteamericano. Tras o visionado da cinta, celebrouse un coloquio co director da mesma, Andrés Goteira, ao que seguiu o recoñecemento ao artista ourensán Miguel Saco, na primeira edición dos premios Galegos con Estrela.
Entre as firmas galegas que estiveron presentes no festival atópanse Estrela Galicia, Café Candelas, Viña Costeira ou Aceites Abril.
