Os gandeiros galegos deixaron de percibir 2.400 euros por vaca debido ao cártel lácteo

"A práctica totalidade das explotacións da comunidade foron afectadas por estas prácticas", afirman desde o bufete Caruncho
Vacas frisonas. XESÚS PONTE
photo_camera Vacas frisonas. XESÚS PONTE

Os gandeiros galegos deixaron de percibir uns 2.400 euros de media por cada vaca durante os anos que estivo activo o cártel lácteo, segundo un informe auditor elaborado polo bufete Caruncho, Tomé & Judel. 

En concreto, os gandeiros afectados polo cártel lácteo -que realizaron vendas entre 2000 e 2013- teñen de prazo ata o 11 de xullo para presentar unha reclamación co fin de optar a unha indemnización polo cobrado de menos debido ás prácticas ilegais de pacto de prezos entre industrias. 

O bufete recorda que poden reclamar "todas" as explotacións, tanto as que manteñen a actividade como as que pecharon nos últimos anos. 

"A práctica totalidade das explotacións gandeiras galegas foron afectadas por estas prácticas, xa que o sector lácteo galego está operado por catro grandes industrias: Leite Río, Leite Celta, Feiraco e Lactalis. Todas elas foron expedientadas, pero no caso das tres primeiras, as súas infraccións xa prescribiron, polo que só poderán reclamar ao amparo da resolución sancionadora os gandeiros que traballan con Lactalis", explican por parte de Caruncho, Tomé & Judel. 

"Das 32.000 explotacións gandeiras que había no ano 2000 pasamos ás 6.000 actuais"

Así, apunta que Lactalis recollía en Galicia de xeito diario un total de 1,5 millóns de litros de leite, máis de 540 millóns de litros ao ano. 

Galicia é a comunidade máis afectada en España polas prácticas do cártel do leite. é a oitava rexión láctea a nivel europeo, concentra o 55% das explotacións lácteas de España e produce preto da metade do leite, pero as súas granxas son as que menos cobran. 

"Das 32.000 explotacións gandeiras que había no 2000 pasamos ás 6.000 actuais, o cártel lácteo foi responsable directo do peche de moitas destas explotacións polas súas prácticas abusivas. Converteron ao sector nun negocio insostible mentres as empresas enriquecíanse", sinala o socio director do buefete, Ignacio Caruncho. 

Comentarios