Especialistas da Garda Civil de Tráfico reconstruirán este martes o accidente no que faleceron tres mozos de 17 anos veciños de Redondela, dúas mozas e un mozo, na autoestrada AP-9 á altura do barrio vigués de Teis o pasado maio.
A investigación da Garda Civil apuntou desde un principio a un exceso de velocidade como posible causa do accidente
Colaborarán na investigación membros do departamento de investigación e reconstrución de accidentes (Dirat) da Escola de Tráfico de Mérida, informaron fontes do instituto armado.
O responsable do Dirat, acompañado do capitán xefe do Subsector de Tráfico de Pontevedra, informará o desenvolvemento das probas técnicas que levan ao cabo para coñecer as posibles causas e as circunstancias nas que se produciu o accidente.
A investigación da Garda Civil apuntou desde un principio a un exceso de velocidade como posible causa do accidente, segundo avanzou o día despois do sinistro o delegado do Goberno en Galicia, Abel Losada.
Os falecidos, dúas mozas e un mozo, viaxaban na parte traseira do Peugeot 207 sinistrado, que quedou esnaquizado tras saírse da vía, chocar contra o gardarraíl, logo contra unha columna e acabar atrapado na mediana.
