Unha veciña do lugar de Trabadela, na Estrada, sufriu este domingo feridas de gravidade ao ser atacada por cinco cans cando regresaba á súa casa tras acudir a misa. O brutal suceso produciuse cando María Fraiz Taboada, de 88 anos, pasaba por diante da primeira casa da aldea, cuxo propietario ten varios cans, algúns de raza perigosa, sen ter a leira valada.
Segundo explicou a AGN unha veciña da vítima, os cans, algúns dos cales son da raza bóxer, abalanzáronse sobre a muller, que caeu ao chan. Indefensa, sufriu mordeduras na cara, unha orella, as pernas e os brazos.
Alertado polos berros da anciá foi un veciño do propietario dos cans o que saíu a rescatala tras presenciar a escena a través da fiestra da súa casa. En pixama, resolveu coller o coche para lograr que os cans se apartaran e así poder coller á muller para resgardala e, a continuación, alertar a urxencias sanitarias e aos familiares da vítima, que nese momento non estaban en casa.
"Isto xa se vía vir", explicou este domingo outra habitante de Trabadela, que asegurou que foron varias as ocasións nas que os veciños instaron o dono dos cans a pechar a súa leira. "Os cans andan soltos e bótanse aos coches, ás bicicletas e a todo o que se move pola estrada, incluso teñen matado outros animais, pero o dono non escoita", indicaron. De feito, a asociación de veciños xa denunciou en varias ocasións a situación ante o Seprona.
Como consecuencia do ataque, María Fraiz foi operada este domingo e o seu prognóstico non transcendeu.
