O grupo cárnico Coren integrará no seu persoal a uns 1350 falsos autónomos, informou este luns o sindicato CC OO, e subliña que esa regularización é obra dunha intensa campaña de denuncia levada a cabo contra esa situación de fraude.
Os autónomos "prestaban servizos para varias empresas do grupo a través da falsa cooperativa Servicarne, denunciada por CC OO ante a Inspección de Traballo", indica o sindicato nun comunicado.
A decisión será efectiva a partir do 1 de agosto e afectará a uns 800 traballadores na provincia de Ourense, 300 na de Lugo e 250 na de Pontevedra.
O sindicato subliña que a súa campaña comezou en decembro contra varias cooperativas de traballo autónomo no conxunto de España acusadas de fraude laboral e expresa o seu agradecemento ao servizo de Inspección de Traballo para resolver a situación.
