domingo. 19.09.2021 |
El tiempo
domingo. 19.09.2021
El tiempo

Haberá máis control policial en Galicia tras os excesos na apertura das terrazas

Xente paseando e nas terrazas en Lugo. XESÚS PONTE
Xente paseando e nas terrazas en Lugo. XESÚS PONTE
A Delegación do Goberno pide ás Forzas e Corpos de Seguridade do Estado e aos concellos que "extremen" a vixilancia durante a fase 1, na que Galicia entrou sen apenas incidencias

O delegado do Goberno en Galicia, Javier Losada, pediu ás Forzas e Corpos de Seguridade do Estado e os concellos que "extremen" o control durante a fase 1 da desescalada. Tamén instou á "responsabilidade" da cidadanía para garantir o éxito da mesma. 

Fíxoo nunha carta remitida á Federación Galega de Municipios e Provincias (Fegamp), para o seu traslado aos alcaldes e alcaldesas, e a través dun vídeo difundido nas redes sociais, no que afirma que é o momento "de ir amodo". "Para avanzar con máis rapidez", recalca en referencia á loita contra o coronavirus. 

Por outra banda, insiste en que é o momento de cumprir "as normas" para poder "avanzar máis rápido se somos consecuentes e temos esa responsabilidade". 

Por iso, afirma que lle pediu ás Forzas e Corpos de Seguridade do Estado "que extremen a petición dese cumprimento" e que o mesmo trasladou a alcaldes e alcaldes. "Para que os policías locais tamén extremen o cumprimento destas normas". 

"É un momento moi importante, recuperamos espazos que perderamos pero o temos que facer con sensatez, con sentido común, con moita responsabilidade, de forma segura e de forma lenta para conseguir avanzar máis rápido", conclúe Losada. 


POUCAS INCIDENCIAS. A apertura das terrazas nos locais de hostalería produciuse, en xeral, en Galicia nun contexto de normalidade, aínda que con algunhas incidencias puntuais nalgúns municipios, segundo aseguraron a Europa Press desde distintos concellos consultados. 

Así, en Vigo, o alcalde, Abel Caballero, informou este martes da intervención da Policía Local nunha cafetería que non respectou o aforamento dunha terraza interior. En Ferrol, a Policía Local denunciou, sobre a unha desta madrugada, ao propietario dun local e a cinco clientes que se atopaban no mesmo por incumprir o estado de alarma. 

"Estaban a consumir bebidas, carecían de medidas de protección individual e non gardaban a distancia mínima de seguridade", expuxeron desde o Consistorio. Aos axentes, o dono do local aseguroulles que se trataba do seu domicilio e que era unha reunión de amigos, pero os policías confirmaron que non había vivenda e que as consumicións se preparaban na barra do bar. 

En Ourense, houbo tamén varios incumprimentos. "Un por falta de respecto á autoridade con graves insultos e doce chamadas de denuncias de veciños", expuxeron. A iso, sumou o feito de que algúns hostaleiros "colocaron sen licenza ou autorización terrazas". No caso dos comercios, indicaron que se detectou que unha barbería tiña "catro persoas dentro e só pode haber unha por empregado". 

"Houbo uns poucos que embazaron o bo facer do resto", aseguraron desde o Concello da Coruña, no que precisaron que xa houbo "algunha sanción". No entanto, incidiron, como outros municipios consultados, en que se fixo, sobre todo, "un traballo enorme de aplicación da nova instrución".

PIDEN NON "RELAXARSE". "E a maioría cumpriron", apostilaron desde A Coruña a pesar de existir algún local no que se vía nas terrazas a xente sen cumprir as medidas de distanciamento. Desde este concello como desde outros se insistiu na importancia de non "relaxarse" nesta fase de desescalada, apelando tanto á cidadanía como a este sector e recordando as normas establecidas polo Goberno e fixadas, á súa vez, polos consistorios. 

"Non pode suceder que a terraza ocupe toda a beirarrúa e os peóns teñan que baixarse á calzada e onte ocorreu", lamentou o alcalde de Vigo, Abel Caballero. No mesmo, coincidiron outros municipios, na afluencia nas terrazas, sobre todo nas primeiras horas. 

Tamén advirten que o labor da Policía Local foi informativa este primeiro día. "Se vemos que o sentido común non aparece, empezaríase a multar", sinalou o alcalde de Vigo, unha cidade na que non se sancionou a ninguén. 

Mentres, o concelleiro da Coruña de Urbanismo, Juan Manuel Díaz Villosllada, recalcou, nun comunicado emitido polo Consistorio, nas normas fixadas a este respecto, como o número de mesas permitidas ou os criterios para poder ampliar as terrazas. 

Á súa vez, o edil de Seguridade Cidadá de Ferrol, Germán Costoya, apelou, como os demais, á "responsabilidade e prudencia", recordando que incumprir as normas "supón sancións dun mínimo de 600 euros". Só nesta cidade, a Policía Local tivo que facer tamén máis de dez advertencias aclaratorias a locais con respecto á normativa. 

En Lugo, a alcaldesa, Lara Méndez, abordou, mentres, co sector as súas propostas ao plan para modificar os espazos públicos para ampliar as terrazas. No encontro, a rexedora apelou á necesidade de ser "respectuoso co mantemento dos espazos para peóns" e para a circulación de vehículos de urxencia.

POUCAS APERTURAS. Municipios con menos poboación subliñaron a normalidade na apertura das terrazas daqueles establecementos que optaron por facelo. Así o trasladaron desde Viveiro, Betanzos, Carballo, Baiona e Cangas.

"Abriron poucos", apuntaron desde o Consistorio de Betanzos, en liña co trasladado por estes outros concellos. Desde este municipio coruñés han precisado tamén que a maior concentración de persoas foi ás primeiras horas, pero que logo se normalizou "sen incidencias". A iso, sumáronse preguntas sobre o horario de apertura das terrazas. 

En Viveiro, só abriron "tres terrazas", segundo precisou a súa alcaldesa, María Loureiro, que confirmou que por parte da Policía Local fíxose, principalmente, "labor pedagóxico" sobre o cumprimento das normas. "Practicamente ningunha", apuntou o rexedor de Carballo, Evencio Ferrero, respecto da situación no centro urbano asegurando, como os demais, que o sector está a esperar a unha seguinte fase. 

"Non máis aló dun 10 ou un 15%", precisou o rexedor de Cangas, Xosé Manuel Pazos, sobre os establecementos que optaron por abrir terrazas. Neste municipio, confirmaron a existencia dalgunhas queixas por detectarse "máis concentración" de xente. Tamén noutros municipios como o caso de Baiona a apertura non chegou ao 10%. "Moitos esperarán a abrir na fase 2 e a maioría farao na 3", apuntou o seu alcalde, Carlos Gómez. 

Haberá máis control policial en Galicia tras os excesos na apertura...
comentarios