O helicóptero da Policía Nacional tivo que realizar o pasado mes de xullo unha manobra para esquivar un dron que se interpuxo na súa traxectoria cando se dispuña a aterrar no aeroporto de Vigo.
O piloto contactou coa torre de control do aeródromo para informar de que entraba na área de control. Unha vez autorizado o acceso, procedeu aproximarse ao campo de voos, momento no que o piloto ao mando da aeronave policial tivo que realizar unha brusca manobra para non chocar cun dron que se atopaba voando en sentido contrario.
A Policía Nacional propuxo para sanción ao responsable deste dron e recordou que estes aparellos deben usarse conforme á normativa estatal reguladora da materia, de non ser así, “proponse para sanción ao usuario ante a Axencia Estatal de Seguridade Aérea”.
A Policía puido identificar con posterioridade ao seu titular e propúxoo para sanción ante a Axencia Estatal de Seguridade Aérea dado o perigo creado e o accidente que puido causar.
Os drones deben, segundo a normativa estatal que os regula, utilizarse fóra de espazo aéreo controlado, a máis de 8 quilómetros do punto de referencia de calquera aeroporto ou aeródromo e a máis de 8 km dos eixos das súas pistas e a súa prolongación ata 6 km desde o limiar das mesmas.
Tampouco deben sobrevoar aglomeracións de edificios nin reunións de persoas, entre outras prohibicións.
