Un condutor sufriu unicamente feridas de carácter leve este venres tras sufrir un aparatoso accidente de tráfico no municipio de Ribeira de Piquín. O sinistro produciuse sobre as nove da mañá, cando o home circulaba pola estrada DP-1906.
Ao chegar á altura do quilómetro 12,200, o condutor perdeu o control do turismo e saíuse da vía. O coche acabou encaixado na canle dun río e o condutor tivo que ser excarcerado polos bombeiros de Vilalba.
Ata o lugar do accidente desprazáronse tamén varios axentes do subsector de Tráfico de Lugo.