A práctica totalidade dos establecementos de hostalería do concello de Verín acordaron pechar de xeito temporal as súas portas os próximos dez días para tratar de conter o avance da pandemia ante o aumento de casos de covid neste municipio. Segundo os últimos datos facilitados polo consistorio, esta localidade contabiliza na xornada deste luns un total de 74 casos activos.
Deste xeito, o acordo, subscrito con amplo "consenso" dos representantes da hostalería e o consistorio local, levará o peche dos bares e terrazas ata o próximo día 23 de outubro, indicaron fontes municipais. Ademais, o goberno local, que preside o socialista Gerardo Seoane anunciou a posta en marcha dunha liña de axudas para axudar aos locais, que pechen con carácter "voluntario", dixo.
Tamén avanzou a intención de realizar "un cribado" masivo entre os traballadores da hostalería co fin de determinar posibles casos e así "minimizar" os riscos de contaxio.
Fontes municipais indicaron que estas medidas serán levadas ao próximo pleno ordinario que se celebrará este martes neste concello ourensán.
