Os deputados de Galicia en Común Yolanda Díaz e Antón Gómez Reino e a exdeputada por Pontevedra Ángela Rodríguez, Pam, foron imputados por un xulgado de Madrid polos incidentes ocorridos durante a concentración de traballadores de Alcoa no Congreso do pasado 28 de marzo. Atribúeselles un delito de atentado contra a autoridade.
Tamén están citados en calidade de investigados o exdeputado de Podemos Rafa Mayoral, varios traballadores de Alcoa e dous dirixentes sindicais de CC.OO.
A concentración contra o peche das plantas de Avilés e A Coruña saldouse cun traballador detido e varias cargas policiais.
A acusación apunta que os deputados incitaron aos manifestantes a saltarse o cordón policial. No caso de Mayoral, o atestado policial asegura que non mostrou ningunha identificación persoal e que participou activamente e de forma reiterada na rotura do valado, empuxando aos policías, recriminando a súa actuación e arengando á xente.
A Policía fixo unha descrición similar da participación de Yolanda Díaz e Ángela Rodríguez. No caso de Gómez Reino, detalla que empuxou dúas veces a un policía coas dúas mans mentres lle dicía "que estades a facer" ou "estamos tolos".
Os imputados reclamaron a comparecencia do ministro do ministro do Interior, Fernando Grande-Marlaska, para que explique como se desenvolveu esta causa xudicial que consideran irregular. "É unha persecución política. é insostible que se persiga aos deputados por defender aos traballadores", incidiron.
