O mozo de 23 anos que esta fin de semana foi detido acusado dunha agresión machista en Moaña (Pontevedra) e por animar ao seu can, de raza pitbull, a atacar aos axentes que o estaban arrestando, pasou este luns a disposición xudicial e posteriormente ingresou nun centro psiquiátrico de Vigo.
Fontes xudiciais informaron da súa situación procesual e de que os axentes localizaran ao detido a 20 metros do lugar da suposta agresión machista, o paseo da praia da Xunqueira.
No momento do arresto o mozo resistiuse e ordenou ao seu can, que ía con correa pero sen boceira, atacar aos axentes. Antes do ataque e segundo a versión policial, o detido díxolles "non tedes ovos para determe", debido á presenza do can.
O animal empezou a abalanzarse sobre un dos policías e, segundo o axente, non tivo máis remedio que disparar ao can, ata en catro ocasións, para defenderse do seu ataque. A pesar dos catro disparos, o animal seguía atacando aos policías e tiveron que refuxiarse nun restaurante próximo. Un Garda Civil de Madrid que estaba de paisano e un Policía Local de Cangas que se atopaban na zona do suceso saíron a axudar a estes axentes de Moaña.
"Era o can ou eu", asegurou a EFE un dos policías que disparou ao animal durante a detención. Este mesmo axente espera unha pronta recuperación do animal xa que "el non ten a culpa de nada".
O animal segue vivo e atópase na protectora de animais desta localidade pontevedresa.
Os axentes tiveron que ser atendidos por varias lesións de carácter leve e o detido estivo no Hospital Álvaro Cunqueiro por varias feridas na cara debidas ao forcejeo que tivo cos policías durante a súa detención.
Nun principio fora trasladado á Casa do Mar de Moaña pero ao estar a ser alí atendida a parella pola suposta agresión foi trasladado ao Álvaro Cunqueiro, sinalaron fontes da investigación.
