Un home de 72 anos foi identificado esta Noitevella pola Policía Local de Pontevedra logo de intentar irse sen pagar dun restaurante da cidade no que ceara e de realizar "condutas inadecuadas" no local, onde se chegou a tirar no chan. A factura da que pretendía desentenderse ascendía a 41,70 euros e correspondía a un menú a base de lagostinos cocidos, centola, chuleta de tenreira, unha copa de viño, torta de Santiago e café.
A Policía Local foi alertada preto da medianoite, sobre as 23.45 horas. Os responsables do establecemento explicaron aos axentes que o home intentara dirixirse á porta de saída para irse sen pagar e que cando se lle reprochou o seu comportamento comezou a comportarse coma se estivese bébedo. Chegaría a "tirarse ao chan do local, chamando a atención de todos os clientes".
Así as cousas, segundo explica a Policía, o septuaxenario foi axudado a incorporarse e sentado nunha cadeira, "xa que aparenta estar en certo estado de embriaguez". E cando lle preguntan por que non paga a cea, di que non consumiu nada.
O home asegurou que chegara a Pontevedra en tren. Varias testemuñas din que un taxi o deixou xunto ao restaurante.