A decidida intervención dun neno de 12 anos, xunto á tenaz resistencia que opuxo a vítima, evitou que un veciño de Lalín consumase o apuñalamento da súa exparella, quen a pesar de todo resultou ferida con numerosos cortes en diversas partes do corpo, aínda que de carácter leve. Agora, a Garda Civil investiga os feitos como un probable caso de violencia de xénero.
O suceso ocorreu a última hora da tarde do luns na parroquia de Goiás, próxima á capital dezada. O home, de 52 anos e veciño do municipio lalinense, desprazouse ao domicilio da súa exparella con intención de recoller ao fillo que ambos teñen en común. Nun momento dado e por causas que non transcenderon —pero segundo fontes da investigación alleas ao menor— iniciouse unha discusión entre a parella que foi subindo de ton ata que o home colleu un coitelo de cociña e atacou á muller.
Ela defendeuse pero non puido evitar que o atacante lle causase numerosos cortes en brazos, cara, pescozo e cabeza, a priori sen que revistan excesiva gravidade. Nese momento, o neno, ao ver a situación, saíu en defensa da súa nai, quen logrou morder na man ao seu agresor e desarmalo. Desa forma, a muller puido fuxir do lugar e ser atendida no centro de saúde de Lalín.
Case ao mesmo tempo, o servizo de Emerxencias 112 recibiu a chamada de alarma e a Garda Civil organizou un dispositivo que resultou coa detención do presunto maltratador, quen permanece nos calabozos do posto de Lalín, Á espera de pasar a disposición xudicial, algo que se podería producir ao longo deste mércores, segundo fontes do caso.
Ao parecer, a parella separárase recentemente, no mes de febreiro, segundo apuntaron na TVG, e agora mesmo estarían en trámites de divorcio. Algunhas testemuñas presenciais dos feitos apuntaron que o encontro entre ambos na vivenda de Goiás para recoller ao menor foi o detonante do sucedido, pois alí pai e nai encerelláronse nunha forte discusión co neno de testemuña.
