A Garda Civil abriu unha investigación a fin de esclarecer un posible caso de violencia de xénero ocorrido no termo municipal ourensán do Carballiño tras ter coñecemento dunha colisión contra un vehículo, no que iría supostamente a súa exparella, e posterior atropelo a un peón.
Fontes próximas á investigación confirmaron que o home de trinta anos foi arrestado como presunto autor dun delito de violencia de xénero e outro contra a seguridade viaria.
Os feitos tiveron lugar ás 17.30 horas cando o servizo de urxencias do 112 Galicia tivo coñecemento dun accidente, consistente nunha colisión contra un turismo e posterior atropelo a un peón, nas inmediacións da estación de ferrocarril, no concello carballinés.
Por mor destes feitos, o 112 avisou do sucedido aos bombeiros, Policía Local, Protección Civil así como a Garda Civil e Policía Nacional que investigan o ocorrido.
As hipóteses iniciais apuntan a que o condutor supostamente embestiu "de forma intencionada" ao outro coche, no que se atopaba a súa ex e, como consecuencia deste golpe, resultou ferido un peón cando estaba a cruzar a rúa. Tras o ocorrido, o condutor continuou a marcha, sendo detido pouco despois e trasladado ao cuartel.
Fontes consultadas indicaron que está previsto que o home pase este mércores a disposición xudicial para declarar por estes feitos.
