Dous mozos galegos, de 26 e 22 anos, perderon a vida e outras catro persoas resultaron feridas nunha colisión múltiple na que se viron implicados un turismo, unha moto e un camión no termo municipal de Quintanapalla (Burgos) e que obrigou á Garda Civil a cortar o tráfico no quilómetro 254 da N-I. As vítimas son orixinarias da provincia de Pontevedra.
O accidente produciuse minutos antes das 15.15 horas. A aparatosidade do mesmo, no que un turismo quedou baixo o camión, obrigou á intervención dos bombeiros para excarcerar a algunha das vítimas.
Ao parecer, o suceso ocorreu cando un camión articulado con matrícula portuguesa, que viaxaba en sentido Burgos, saíuse do seu carril por causas que se descoñecen e chocou con dous turismos que circulaban en sentido Irún.
Un dos dous turismos, ocupado por un home e o seu fillo, saíuse da vía, mentres o outro, no que viaxaban os dous mozos galegos que perderon a vida, unha muller e un home que conducía o coche, quedou baixo o camión. O motorista caeu ao intentar esquivar o accidente.
O persoal sanitario confirmou no lugar o falecemento de dous dos feridos, un home de 26 anos e unha muller de 22, e atendeu e trasladado a catro homes, de 18, 52, 53 e 58 anos, en ambulancias de soporte vital básico ao Complexo Asistencial de Burgos. A N-I estivo cortada algo máis de tres horas como consecuencia do accidente.