A Audiencia de Pontevedra decretou liberdade provisional para Segundo C., o relixioso salesiano adscrito ao colexio María Auxiliadora de Vigo que ingresou en prisión fai máis de nove meses por supostos abusos sobre menores de idade e que aínda está pendente de ser xulgado.
Se lle conmuta a prisión pola liberdade provisional a cambio do pago dunha fianza de 12.000 euros, a retirada do pasaporte e a prohibición de saír do país, e prohíbeselle aproximarse aos menores presuntas vítimas de abusos a unha distancia inferior a 500 metros, así como comunicarse con eles por calquera medio.
A Audiencia asume que, a pesar de subsistir un risco de fuga dada a entidade da pena que puidese imporse, ha de terse en conta o tempo que o investigado leva privado de liberdade e que a celebración da vista oral non parece inminente.
Tamén considera atenuado o risco de reiteración do delito por parte deste relixioso, por canto a súa actividade profesional como docente e monitor na orde salesiana, contexto no que terían lugar os presuntos abusos, está suspendida polo estado de alarma.
O relixioso foi sorprendido por outros menores mentres realizaba os tocamentos
A defensa do investigado tamén alegaba que a permanencia do seu cliente en prisión provisional incrementaba o risco de contaxiarse de coronavirus, e que ademais padece asma.
Sobre este último aspecto, a Audiencia de Pontevedra sinala que "o xenérico argumento" sobre a situación derivada do estado de alarma "non xustifica que deba atenderse a petición" do recorrente.
O Xulgado de primeira instancia e instrución 4 de Cambados decretou en xullo de 2019 o ingreso en prisión provisional comunicada e sen fianza deste sacerdote salesiano por varios delitos de abusos sobre menores de idade, en dous casos de forma continuada.
A Policía Nacional detivo a este relixioso por supostamente realizar tocamentos a polo menos seis menores mentres durmían nun campamento de verán en Cambados, segundo informaron a Efe fontes da investigación. O relixioso foi sorprendido por outros menores mentres realizaba os tocamentos.
A dirección do colexio Salesianos María Auxiliadora de Vigo decidiu apartalo de forma inmediata do seu traballo cos menores e incoou un expediente informativo.
