O delegado do Goberno en Galicia, Javier Losada, móstrase "esperanzado" co mantemento do emprego da factoría de Alcoa na Coruña ante a posibilidade de atopar un novo investidor que se faga cargo da factoría, pero sen descartar que a multinacional norteamericana retire o Ere extintivo e manteña a súa actividade, e asegura que "hai partido".
Tras pór en valor que "se conseguiu que a empresa sentase a negociar" e non puxese o 30 de novembro como "data última para a súa decisión", en entrevista na Radio Galega, afirmou que se van dando pasos neste partido que hai que xogar ata o último minuto".
Losada pon en valor "unidade de acción" alcanzada entre traballadores e institucións pero tamén o traballo do Goberno, a través dos Ministerios de Industria e Transición Enerxética, que se orienta a definir un "marco enerxético" en paralelo a lograr un novo investidor "para manter o que Alcoa non quere". En todo caso, remarca que o primeiro obxectivo segue sendo intentar que a multinacional continúe a súa actividade na Coruña e Avilés.
"É difícil, é complicado, pero ata o último momento, hai que dalo todo, como nos partidos de fútbol, hai partido", remarcou un Javier Losada que minimiza a sensación inicial de enfrontamento entre administracións pola repartición de culpas e prefire destacar a "unidade" lograda entre os gobernos de Galicia, Asturias e o Executivo central, os sindicatos e o Comité de Empresa. O delegado do Goberno recoñece, no entanto, que fronte á actuación de Alcoa, cuxo expediente de regulación de emprego estuda o Ministerio de Traballo para determinar se é impugnable, "a reforma laboral" aprobada polo PP limita moito as posibles accións do Executivo.
E vinculada á cuestión de Alcoa tamén xorde a pregunta sobre o futuro das plantas de Meirama e As Pontes. Losada móstrase contundente respecto diso e defende que se manterá a actividade, aínda que o Goberno traballa no "camiño que marca Europa".
DESENTULLO DE PARAMOS. O delegado do Goberno tamén se referiu á situación de Tui, tras a explosión pirotécnica dun almacén ilegal na parroquia de Paramos no pasado mes de maio. Javier Losada insta o alcalde a mover "ficha" para acometer o desentullo da denominada zona cero e defende que o Goberno fixo "todo" o que solicitaron os afectados, como as exencións nas axudas ou no IRPF.
Pero no que respecta ao rebo, asegurou que o Concello ten que establecer un convenio que estea articulado conforme á legalidade. "Eu o que pido é que o alcalde faga o seu traballo, nós como Goberno fixemos todo, incluso traballar para que se poida facer o desentullo da parroquia, pero o que ten que articularse é o que marca a legalidade", remarcou, para apelar a continuación á Xunta, porque "tería que axudar ao concello cando está limitado" para a realización de determinados trámites.
Cuestionado pola ausencia da subdelegación do Goberno en Pontevedra na última reunión con afectados, Xunta e Concello, Losada argumenta que se trata dunha "reunión que non ten razón de ser porque esa comisión fíxose cando había unha urxencia, nese momento, cando acabou a urxencia, terminou o fin desa comisión".
CINCO MESES NA DELEGACIÓN DO GOBERNO. Cinco meses logo do seu nomeamento como delegado do Gobieno, Javier Losada reivindica a súa xestión e confróntaa coa dun PP co que a Delegación "estaba como desaparecida" e "parecía que fose subsidiaria doutras administracións".
Losada pon de relevo que o Executivo de Pedro Sánchez consiga así estar presente "en toda a actividade social, política, económica e cidadá de Galicia" e que, a través da Delegación, transmítanse os seus avances nas "pensións, as bolsas, as infraestruturas, a sanidade, a educación, o benestar, con aquelas cousas que se están recuperando en dereitos, cooperando legalmente coa Xunta de Galicia e as Deputacións".
