Un total de 107.412 persoas proporcionaron os seus datos de contacto no rexistro de viaxeiros que puxo en marcha a Conselleríae o pasado día 29 de xullo en relación coa xestión da pandemia de Covid-19.
Delas, 62.446, o 58,1% do total, proceden das distintas comunidades autónomas con comunicación obrigatoria, concretamente 29.783 do País Vasco, 24.150 de Cataluña, 3.674 de Aragón, 3.011 de Navarra e 1.828 da Rioxa.
Así mesmo, rexistráronse 449 viaxeiros que chegaron dos países cun risco epidemiolóxico máis elevado. Concretamente 121 desde Estados Unidos, 75 de Luxemburgo, 75 de México, 46 de Brasil, 42 da República Dominicana, 33 de Romanía, 22 de Chile, 16 de Ecuador, 11 de Perú e 8 de Colombia.
O resto dos casos corresponden a viaxeiros doutros países con risco epidemiolóxico menos elevado que os anteriormente citados ou a viaxeiros que se rexistraron voluntariamente, xa que proveñen de comunidades autónomas e países que non son de declaración obrigatoria.
A Consellería de Sanidade recorda que todos os viaxeiros que cheguen a Galicia, tras permanecer dentro do período de 14 días anteriores á súa chegada en territorios que posúan unha incidencia epidemiolóxica 3,5 veces superior á de Galicia, deberán comunicar os seus datos de contacto ás autoridades sanitarias. Esta norma é de obrigado cumprimento, independentemente de que os viaxeiros residan a nosa comunidade ou non.
As persoas que visiten Galicia, teñen 24 horas desde a súa chegada para comunicar os seus datos de contacto, un trámite que terán que realizar cada un deles. A lista dos territorios cuxa incidencia epidemiolóxica requira deste deber pode consultarse na web do Sergas e será actualizada quincenalmente.
