Con gheada e seseo, enfundado nun traxe marrón claro e negando calquera relación co tráfico de drogas. Así se presentou Marcial Dorado ante Jordi Évole para unha entrevista que LaSexta pospuxo hai un mes e que foi emitida este domingo. "Coñezo a honradez de Feijóo; se podo, votarei por el". Ese foi un os titulares que deixou quen se fixo coñecido en toda España en 2013 pola famosas fotografías publicadas por El País nas que se lle ve nun barco xunto ao hoxe presidente da Xunta.
O arousán, que cumpre condena por narcotráfico e branqueo de capitais, empezou narrando os seus inicios no contrabando. "Cheguei moi cativo. Andaba na motora. E tiña 11 anos. Planadoras nunca pilotei, barcos si, barcos pesqueiros. Nunca tiven unha lancha desas", explicou Marcial da Illa, como era coñecido polas súas propiedades en A Illa de Arousa.
Dourado negou que houbese un star-system de narcotraficantes en Galicia e que tivese relación con outros nomes coñecidos como Laureano Oubiña ou Os Charlíns. "Eu as únicas palabras que falei con Oubiña foron en Meco [o cárcere madrileño]; paréceme un tipo moi legal. Nunca tocou a cocaína. Andaba co chocolate. Os Charlíns? Sito Miñanco? Bos días. E nada máis", seguía Dorado, mentres Évole líalle as sentenzas polas que fora condenado e el negaba a súa vinculación cos alixos que o levaron ao cárcere. "Isto é unha vendetta, unha trampa", repetía o narcotraficante. "Nunca estiven droga. Estou en contra da droga", insistía.
FOTOS CON FEIJÓO. Sobre as fotografías con Alberto Núñez Feijóo, Dorado asegurou que foi a el a quen "afundiron" porque non lle concederon varios permisos carcelarios por mor da súa publicación en El País. Nesas imaxes vese a ambos nun barco: "Eramos unha cuadrilla moi grande: non eramos o señor Feijóo e eu. Non andabamos ocultos. Sabíao todo o mundo. Esas fotos non terían valor se eu non estivese condenado por narcotráfico e tiveron que esperar a iso para sacalas".
Dorado explicou que a súa amizade se acabou 2000 ou 2001 e mostrouse molesto co feito de que o hoxe presidente da Xunta acabase renegando del. Tamén se referiu ás vacacións que compartiron nos anos noventa, ás que ían "varios matrimonios": "Feijóo en Eivissa: de noite nada, tirarse á auga, ler, non ten vicios. Non bebe non fuma. Penso que sempre foi un vello".
O capo arousán tamén falou sobre o financiamento irregular de varios partidos, especialmente do PP: "Pero aquí tamén viñeron do PSOE, a este despacho", espetou Dorado, dando a entender que tivo contactos cun ministro do Goberno de José Luís Rodríguez Zapatero, cuxo nome non quixo revelar.
