A Asociación de Médicos Interinos de Galicia (Asmig) instou ao Servizo Galego de Saúde (Sergas) a distribuír kits de adrenalina nos centros de atención sanitaria dos municipios, para combater as picaduras da vespa asiática, ao considerar que se rexistrou unha "proliferación" dos casos de atención de urxencias este verán.
A demanda da asociación foi proclamada este martes, a través dun comunicado de prensa, no que solicitou á sanidade galega o envío das unidades de kits antialergia aos centros de saúde, ante o "baixo custo" dos mesmos, a "alarma social" vixente e os "casos de morte" que se deron nas últimas semanas.
Neste sentido, o presidente do Colexio de Farmacéuticos da Coruña, Héctor Castro, apuntou o pasado venres 27 de xullo, que as farmacias percibiron un "lixeiro aumento" na venda destes medicamentos e que existe "moita demanda de información", aínda que non unha situación de desabastecemento "".
Á marxe do estado das farmacias, Asmig considera que ante unha "urxencia sanitaria" os centros de saúde deben contar con dose de adrenalina para nenos menores de 30 quilos e para persoas de máis peso, xa que, a día de hoxe, as bochas dispoñibles deben "buscarse, cargarse e coñecer a dose exacta" que se ten que administrar.
Ademais, a asociación tamén instou á Xunta a que declare como "infesta" a "invasión" desta especie, unha reclamación que se suma á realizada por Unións Agrarias o pasado xoves 2 de agosto, porque o problema "incide na saúde pública".
