O Servizo Galego de Saúde (Sergas) acaba de sacar a licitación a compra de 22 novos sistemas de anestesia para os bloques cirúrxicos dos hospitais galegos, cun investimento total que ascende aos 958.320 euros, financiada ao 80% pola Unión Europea con cargo ao Programa Operativo FEDER 2014-2020.
Segundo informou a Consellería de Sanidade, os novos equipos médicos que vai adquirir o Sergas son “de altas prestacións e mellorarán as técnicas anestésicas, sobre todo en cirurxías de moi longa duración” por mor da súa “complexidade”.
De feito, incorporarán tecnoloxía que “permite reducir ao mínimo os axentes anestésicos fornecidos”, ademais de incluír “técnicas automáticas de recuperación do paciente postanestesia”.
“Todas esas melloras”, engade Sanidade, “redundarán na seguridade do paciente e nunha mellor e máis rápida recuperación”, ademais de facilitar “o traballo” dos profesionais sanitarios.
Outra das particularidades dos novos equipos radica en que son máquinas que utilizarán “sistemas respectuosos co medio ambiente e incorporarán ferramentas de xestión que axudan a reducir o axente anestésico”.
Beneficiaranse destes novos sistemas o Complexo Hospitalario Universitario de Santiago, o Hospital Lucus Augusti de Lugo, o Hospital de Montecelo, o Hospital Álvaro Cunqueiro, o Meixoeiro (en Vigo), o Hospital de Ourense e o Arquitecto Marcide (Ferrol).
