Morre un home en Cee nun novo accidente de tractor

Oficina do 112. ARQUIVO
photo_camera Oficina do 112. ARQUIVO

Un home faleceu este venres tras sufrir un accidente en Cee co tractor que manexaba, que envorcou. Para poder acceder á vítima foi necesaria a axuda dos equipos de rescate, aínda que nada puideron facer por salvarlle a vida. 

Este sinistro produciuse apenas unhas horas despois de que outro home morrese —o xoves— nun sinistro cun tractor en Castrelo do Val.

No caso de Cee, a central do 112 Galicia informou de que pasaban uns minutos das 14.00 horas cando tivo constancia do sinistro a través da chamada de alerta de Urxencias Sanitarias de Galicia-061. Os profesionais sanitarios informaron de que unha persoa estaba baixo un tractor nunha parcela situada na parroquia de Brens, no lugar de Fadibón. 

O 112 informou aos bombeiros de Cee, así como aos axentes da Garda Civil e Policía Local, e aos voluntarios de Protección Civil da localidade. Ata o lugar desprazouse un equipo médico que só puido confirmar o falecemento do home.