Axentes de bombeiros localizaron sen vida o corpo dun home que se atopaba no interior dunha vivenda en chamas este sábado en Salvaterra de Miño (Pontevedra).
Segundo explicou o 112-Galicia, o falecido estaba dentro da súa casa cando un incendio se propagou polo seu tellado e "devorou por completo" a vivenda, situada no lugar de O Souto, do municipio pontevedrés de Salvaterra.
Os axentes de bombeiros precisaron que o único ocupante do inmoble era a vítima, un home con mobilidade reducida que foi achado sen vida no momento no que os efectivos de extinción entraron na vivenda para sufocar o incendio.
Foron os veciños os que deron a voz de alarma ao avistar dende os seus domicilios as chamas, que saían do tellado dunha casa. Nese momento, ás 21,15 horas, avisaron da situación ao 112-Galicia e comunicaron que, probablemente, no interior se atopase o inquilino da casa.
Ata o lugar desprazáronse, ademais dos bombeiros, os profesionais de Urxencias Sanitarias de Galicia-061, aínda que nada puideron facer por salvarlle a vida á vítima do incendio, que foi achado pouco despois de que os axentes entrasen na casa para sufocar as chamas.
Despois de traballar durante horas, os bombeiros deron o incendio por extinto ás 02,30 horas deste domingo.
