A Consellería de Sanidade informou este venres da morte doutras 13 persoas ás que se lles diagnosticara coronavirus, co que xa son 1.132 os falecidos na comunidade como consecuencia do covid.
Dúas das últimas vítimas estaban ingresadas no Complexo Hospitalario Universitario da Coruña (Chuac): un home de 79 anos e unha muller de 77. Outros dous falecidos eran usuarios da residencia de San Cibrao, en Cervo. Unha era unha muller de 100 anos que morreu no propio centro e o outro, un home de 93 anos trasladado ao Hospital da Mariña.
No Hospital do Barco de Valdeorras faleceu unha muller de 72 anos procedente da residencia de Viana do Bolo, e no Chuo, un home de 85 que vivía na residencia Nosa Señora dos Milagres de Barbadás. Ademais, unha muller de 86 anos morreu na residencia Hermanos Prieto do Carballiño.
Outra das mortes rexistrouse no Chup —un home de 77 anos— e no Chuvi faleceron un home de 64 anos e dúas mulleres, de 95 e de 87, esta última procedente da residencia El Doral. No Hospital do Salnés estaba ingresada outra vítima, un home de 86 anos que procedía da residencia Valvanera de Cambados. Noutra residencia da provincia, a de Salvaterra do Miño, morreu unha muller de 92 anos.
Do total de vítimas mortais contabilizadas en Galicia desde o inicio da epidemia hai polo menos 478 vinculadas a residencias de persoas maiores, segundo os datos da Xunta.
