O condutor dun patinete eléctrico que circulaba de forma temeraria e baixo os efectos do alcol polo centro de Pontevedra será multado con 1.000 euros.
Foron varios os transeúntes que chamaron este luns á Policía Local para advertir da situación que estaba a ocorrer nas inmediacións da Praza de Curros Enríquez ao redor das 15.30 horas. Tras acudir ao lugar e facerlle o control de alcoholemia, o condutor do patinete triplicou a taxa de alcol permitida.
A sanción administrativa neste caso é de 1.000 euros. O Concello de Pontevedra traballa desde hai meses nunha normativa específica para os Vehículos de Mobilidade Persoal (VMP). Aínda que para algúns poden parecer pouco máis que un xoguete, a realidade é que chegan a alcanzar os 25 ou 30 quilómetros por hora e o seu uso, polo momento, carece de regulación.
A Dirección Xeral de Tráfico, mentres non se elabora unha normativa específica, optou en 2016 por propor unha serie de criterios aos concellos, que son os que agora se aplican.
Este non é o primeiro incidente relacionado cun patinete eléctrico na Boa Vila, pois hai algo máis dun mes unha muller resultou ferida ao chocar co seu contra un vehículo.
