Cambados xa vive a Festa do Albariño que comezou este mércores pola mañá co pregón e a inauguración das casetas do Paseo da Calzada. A cambadesa Merchi Álvarez, presidenta da Fundación GaliciAME, foi a encargada de pronunciar o pregón desde o balcón do concello, sendo a primeira muller en facelo e coa multitudinaria presenza de veciños e visitantes que aplaudiron as súas palabras sobre o albariño.
Posteriormente, a comitiva institucional, coa presenza da alcaldesa, Fátima Abal; a conselleira de Medio Rural, Ángeles Vázquez; a presidenta da Deputación de Pontevedra, Carmela Silva, e o presidente do D.O. Rías Baixas, Juan Gil de Araújo, inauguraron a contorna vitivinícola co tradicional corte da cinta no Paseo da Calzada.
Todos eles procederon a realizar o tradicional percorrido polas casetas das 42 adegas que participan este ano e coincidiron en resaltar a importancia da Festa do Albariño para a promoción turística e para o sector vitivinícola.
O presidente do D.O. Rías Baixas sinalou ademais que este ano se porán a disposición 35.000 cataviños de talo curto para evitar cortes, e que a vendima deste ano preséntase mellor do esperado e poderíanse recoller 36 millóns de quilos de uva. A proposta cultural do Albariño para este día inaugural será Kepa Junquera & Sorginak, que actuarán a partir das 22.00 horas en Fefiñáns.
Ademais, haberá outras actividades distribuídas por diversas zonas do municipio nunha iniciativa patrocinada polas adegas Martin Codax, Condes de Albarei e Paco & Lola, no marco dun convenio de colaboración co Concello de Cambados e que contará con circo, teatro e humor no xardín da biblioteca municipal Luis Rei, monólogos en Santa Mariña e actuacións musicais en diferentes contornas.
