A Rede Transfronteiriza dos Camiños Xacobeos do Oeste Peninsular, que aspira a poñer en valor o patrimonio cultural e natural mediante o desenvolvemento de infraestruturas e servizos nas rutas con maior tradición, foi constituída este luns.
A iniciativa conta coa participación de 13 entidades portuguesas e españolas entre as que se atopan a Deputación de Pontevedra, segundo detalla esta última nun comunicado. Ademais, integráronse na rede as deputacións de Badajoz, Cáceres, Cádiz, Córdoba, Huelva, Ourense, Sevilla e Zamora, así como a Junta de Estremadura e as entidades lusas Turismo do Alentejo, Turismo do Centro e a Câmara Municipal de Barcelos.
A asemblea constituínte celebrouse este luns por videoconferencia e no marco da mesma aprobáronse o manual de procedemento e o rexistro da marca e o logotipo na rede da Oficina Española de Patentes e Marcas e a Oficina da Propiedade Intelectual da Unión Europea.
A iniciativa conta cun orzamento de 2,5 millóns de euros cofinanciados nun 75% por fondos europeos a través do Programa Operativo de Cooperación Transfronteiriza Interreg V-A España-Portugal 2014-2020 (Poctep).
Este proxecto buscará mellorar os camiños e potenciar o seu carácter transfronteirizo. Deste xeito, levarán a cabo actuacións conxuntas para enxalzar o patrimonio histórico, cultural e natural do territorio e contribuír ao desenvolvemento sostible deste último.
A iniciativa conta coa participación de 13 entidades portuguesas e españolas
OBXECTIVO. O obxectivo pasa por articular unha estratexia centrada en infraestruturas e servizos das rutas xacobeas que discorren polo oeste peninsular, como a Vía da Prata, o Camiño Mozárabe, o Camiño Portugués e o da Costa. Así, establecerase unha acción homoxénea de sinalización durante 2021 e 2022 mediante un plan global e traballarase na mellora de equipamentos, ademais de poñer en valor as rutas como recursos turísticos a través do desenvolvemento dunha aplicación.
A rede transfronteiriza contará tamén cun logotipo que recollerá a tradición xacobea nunha cuncha de vieira e implantará unha estratexia para incrementar a coordinación en accións de conservación, dinamización, difusión e prestación de servizos no Camiño. Así, realizaranse xornadas de divulgación, intercambios de experiencias e accións de sensibilización.
No marco de rede de cooperación, a Deputación de Pontevedra porá en marcha unha exposición itinerante denominada Camiños do sur que percorrerá Tui, Baiona, Pontevedra e Caldas de Reis, entre outras localidades. Esta iniciativa incluirá a realización de conferencias e debates e unha acción lúdica dirixida á poboación infantil.
A mostra porá o foco na antigüidade do Camiño portugués, a súa actualidade e a súa relación coa paisaxe, as tradicións, os pobos, as cidades, a cidadanía e a cultura. Así, presentará o percorrido do Camiño e os datos históricos da súa historia, ademais do feito de que se aliñe cos Obxectivos de Desenvolvemento Sostible da Axenda 2030 da Onu.
