Unha muller denuncia que os veciños de Gaxate, na Lama, a obrigaron a irse do pobo tras denunciar que un aldeán abusou sexualmente da súa filla, de doce anos. Os feitos saíron á luz este xoves pola mañá durante o xuízo polos citados abusos que se celebra na Audiencia de Pontevedra, no que a Fiscalía pide 4 anos de cárcere para o investigado.
A testemuña sinalou que se viu obrigada a abandonar a súa casa polas presións dos veciños. "Recibían á nena gritando cando chegaba do autobús escolar", dixo, ao que engadiu que "viñan pola noite á miña leira".
A denunciante sinalou que desde o día dos presuntos abusos, en maio de 2017, a súa filla non puido volver baixar ao parque e comezou a temer ao resto das persoas. Todo iso fixo que a familia tivese que trasladarse a Ponte Caldelas, tal e como sinalou a nai da menor.
En canto ao episodio de presuntos abusos ocorrido no bar próximo á parada do bus escolar, o acusado negou os feitos, pero a vítima e os seus familiares mantiveron a súa versión inicial, indicando que o investigado lle realizou tocamentos nos servizos do local.
