A muller de 70 anos e o mozo de 27, nai e fillo, que faleceron este luns en Ourense tras precipitarse desde o alto dunha pasarela á estrada N-120 tiñan unha complicada situación familiar en Barcelona. Por ese motivo, xa na cidade das Burgas, estiveron en contacto cos servizos sociais municipais e a Policía.
A información divulgada por algúns medios apunta a que nai e fillo, que chegaran uns días antes procedentes de Barcelona e se aloxaban nun hostal, rexeitaron presentar unha denuncia. Tamén desbotarían acudir a un albergue municipal ou unha casa de acollida.
O que trasladaron a axentes e servizos sociais reforza a hipótese de que se quitaron a vida.