O contrato para a instalación do mercado e da nora xigante que o Nadal pasado se erixiu en principal atracción da celebración en Vigo quedou deserto, segundo avanzou o PP local, que pide que o goberno local non o volva a sacar a licitación.
O portavoz dos populares vigueses, Alfonso Marnotes, asegurou en rolda de prensa que o prazo para a recepción de ofertas finalizou o pasado día 22 sen que ningunha empresa entrase na poxa, e defendeu que "se non as hai, non deben buscarse".
Opina que "non é realista" expoñer a instalación de atraccións ou dun mercado do Nadal como tampouco é o momento de falar das luces de Nadal, dadas as circunstancias, co avance da pandemia do coronavirus e a declaración dun novo estado de alarma.
Antes que a suspensión de todos os actos, o PP de Vigo pide "claridade" e "prudencia" nas mensaxes que lanza o alcalde, o socialista Abel Caballero, porque cre que está "a confundir" e facendo "unha invitación tácita" á poboación "para concentrarse, reunirse" na rúa.
Os populares chaman a controlar os aforamentos nos buses e a dedicar o diñeiro non gastado nas festas a axudas ao comercio e a hostalería
A xuízo de Marnotes, Abel Caballero "meteuse nunha rúa sen saída" cando en agosto tivo "o atrevemento" de anunciar a toda España a instalación da iluminación do Nadal "coma se nada cambiase respecto ao ano pasado" pola irrupción do covid-19.
A partir de aí, o popular xulga "secundario" falar nestes momentos do Nadal, algo ao que "non se lle debe dedicar máis tempo", senón ás medidas de protección que debe adoptar o goberno local como "autoridade sanitaria" na parte que lle toca.
Entre esas medidas, esixe que se reforce a desinfección dos espazos públicos e se controlen os aforamentos nos autobuses urbanos, que se esixa á concesionaria, Vitrasa, que aumente as frecuencias en horas punta, e que se sancione cando se comproben infraccións.
Nesa liña, o portavoz dos populares vigueses pregúntase como se van a controlar os aforamentos nas rúas do centro en Nadal, a través de cámaras, como anunciou o alcalde, e "a que custo", cando "nin sequera é capaz" de facelo nos autobuses urbanos.
O PP pide tamén reforzar a Policía Local, para controlar e vixiar o cumprimento da normativa sanitaria e do toque de queda, dos Bombeiros e dos servizos sociais, para evitar as "colas da vergoña". Ademais, urxe a dedicar o diñeiro non gastado das festas de verán e o previsto da Nadal a axudas a comerciantes e hostaleiros.
