Un neno de seis anos de idade resultou ferido na mañá deste luns en Cangas ao ser atropelado por un vehículo, aínda que o seu estado "aparentemente" non reviste gravidade.
Segundo informou o 112 Galicia, os feitos ocorreron na parroquia de Coiro, concretamente na Avenida José María Castroviejo, á altura do número 5, e o primeiro aviso deuno un particular sobre as 10.30 horas deste luns.
Ao ter coñecemento do sucedido, o 112 deu aviso a Urxencias Sanitaris de Galicia-061, á Policía Local, a Protección Civil e a Bombeiros do Morrazo. O 061 confirmou a Europa Press que ata o lugar desprazáronse unha ambulancia asistencial e un médico de atención primaria, e finalmente unha persoa foi trasladada ao Hospital Álvaro Cunqueiro.
Así mesmo, fontes de Protección Civil informaron a Europa Press de que ao parecer o neno atopábase cos seus pais, que están en Cangas de vacacións, cando foi atropelado, e apuntaron que supostamente o accidente ocorreu fóra do paso de peóns.
De acordo con estas fontes, no atropelo o neno sufriu "un pequeno golpe" na cabeza, e tamén se "queixaba do nocello", polo que foi trasladado en ambulancia. Así mesmo, o condutor do vehículo tivo que ser atendido por unha crise de ansiedade.
