O verán afronta a súa última semana antes de que o domingo, ás 3.54 da madrugada, faga acto de presenza o outono. A súa chegada será calorosa, con temperaturas aínda estivais polo menos durante os primeiros días, polo que xa pode falarse de que a terceira estación do ano aterrará en forma de veroño, a coloquial expresión que se utiliza para definir eses días en que o estío parece apropiarse aínda do seu sucesor.
As temperaturas serán autenticamente estivais, máis propias de agosto, nesta recta final da estación asollada, segundo avanzou a Efe Rubén del Campo, portavoz da Axencia de Meteoroloxía (Aemet). "O anticiclón dos Azores afectaranos de cheo e, conforme avance a semana, a calor irá a máis", sinala.
Durante a fin de semana e o principio da próxima, Galicia estará baixo a influencia das altas presións
Galicia non será unha excepción. Segundo Meteogalicia, as máximas oscilarán entre os 23 e os 30 graos en boa parte da comunidade durante toda a semana, na que os ceos, polo xeral e agás o paso dalgunhas frontes débiles, estarán despexados.
Pero para a fin de semana, precisamente coa chegada do outono, prevese que Galicia quede aínda máis baixo a influencia das altas presións, unha situación que se manterá a principios da seguinte semana. "Agárdase moi baixa probabilidade de precipitación, con temperaturas altas para a época do ano", indica Meteogalicia na súa previsión.
