O exsecretario xeral do PSdeG Pachi Vázquez levou este venres a Pontevedra a presentación do seu novo proxecto político, Espazo Común, e confirmou co acto que terá como referente na cidade a exconcelleira de Ciudadanos María Rey. A exedil uniuse ao proxecto xunto con todo o equipo que abandonou a formación laranxa o pasado mes de xuño e afronta o que cualifica como unha aventura "ilusionante".
No acto, Pachi Vázquez defendeu que Galicia necesita "proxectos específicos de país" que non teñen nin PSOE nin PP, nin tampouco Podemos e Ciudadanos, "partidos que —dixo— viñan de novo e son peores". Nesa liña, asegurou que Espazo Común busca "romper moldes" fronte aos partidos tradicionais que, ao seu xuízo, "esquecéronse das persoas" e só utilizan os votos da xente "para a súa propia axenda política".
O exlíder dos socialistas galegos deixou aí algún reproche ao actual secretario xeral do PSdeG, Gonzalo Caballero, para lamentar que, ao seu xuízo, sexa "grumete" de Pedro Sánchez e que Galicia "non pinte nada" para o PSOE. "Caballero vai no barco de Sánchez acoplado. Se o barco vai ben perfecto e se non vai ben non pasa nada", sinalou Vázquez.
Vázquez presenta Espazo Común como unha formación "socialdemócrata, de centro esquerda e de ámbito galego"
Vázquez presentou Espazo Común como unha formación "socialdemócrata, de centro esquerda e de ámbito galego", que pretende explorar "novos escenarios" e centrar a súa acción política "nas cidades e nos pobos" sendo unha corrente política "útil", que "marque diferenzas" e que axude a mellorar a vida diaria dos galegos. Ao seu xuízo, no actual panorama político hai espazo para este novo partido, que, por agora, se atopa en fase "xerminal", polo que, segundo expresou, pensarase moito en cales serán os seus próximos pasos.
Así as cousas, o ourensán descartou case totalmente presentarse ás eleccións xerais de novembro e avanzou que tampouco marca o seu obxectivo nos comicios autonómicos de 2020. A súa presenza nesa cita dependerá, dixo, da "velocidade de crecemento e expansión", de se aprecian que existe "masa crítica" e de se a formación conta, tras falar con pequenos partidos de toda a comunidade, cun proxecto "global e específico" para toda Galicia.
