Un petroleiro cargado con 37.000 toneladas de gasóleo atracou este domingo no Porto Exterior de Punta Langosteira da Coruña tras sufrir unha avaría mecánica mentres navegaba fronte á costa do mar Cantábrico. Á primeira hora deste domingo, o buque, de 176 metros de eslora e 31 metros de manga, atracou no porto logo de solicitar abrigo "para evitar problemas maiores" tras detectar un fallo no motor.
Así, en coordinación con Capitanía Marítima e os diferentes servizos portuarios, o petroleiro chegou remolcado sen contratempos ao Porto Exterior, onde permanecerá varios días para ser reparado.
MÁIS CASOS. Tal e como recordou o Porto da Coruña, non é a primeira vez que as instalacións de Punta Langosteira liquidan situacións similares. En decembro de 2016, o petroleiro Max Jacob atracou tamén cun fallo mecánico, cando navegaba con preto de 150.000 toneladas de fuel. Meses despois, en xullo de 2017, o quimiqueiro Njord Cloud solicitou abrigo en condicións parecidas.
"Estes feitos pon en relevo a importancia do Porto Exterior non só como axente dinamizador do desenvolvemento industrial da comarca, senón tamén como infraestrutura estratéxica na defensa da seguridade marítima de Galicia e do medioambiente", subliñou a Autoridade Portuaria da Coruña.
Neste sentido, esta situación, ao seu xuízo, reforza a necesidade de completar as dotacións da nova dársena coa "correspondente" conexión ferroviaria que permita ter un porto "totalmente operativo" no ámbito da conectividad terrestre e a intermodalidad no transporte de mercancías.
