Varios colectivos pediron este luns explicacións pola morte dunha enferma no Complexo Hospitalario Universitario da Coruña (CHUAC), aínda que o centro médico asegurou que a paciente foi atendida en todo momento.
A Coordinadora Antiprivatización da Sanidade Pública uniuse este luns ás esixencias de diversas entidades e á familia dunha muller de 73 anos que faleceu tras ingresar con cancro no servizo de urxencias, pero que segundo a súa contorna non foi derivada a planta porque non había camas dispoñibles.
Fontes do CHUAC negaron, en declaracións a Efe ese extremo, pois aseguraron que a enferma foi atendida "en todo momento", non só por médicos do servizo de urxencias, senón tamén por profesionais de oncoloxía que non puideron facer nada por salvar a súa vida.
Os defensores da sanidade pública, en cambio, culpan ao hospital e á Xunta da situación, alegando que os recortes orzamentarios levaron ao falecemento desta persoa, debido á falta de máis persoal sanitario e ao peche de camas hospitalarias.