O Diario Oficial de Galicia (DOG) publicou este venres a convocatoria de 60 cursos descentralizados –organizados pola Academia Galega de Seguridade Pública (Agasp) e a Secretaría Xeral de Igualdade da Xunta de Galicia– dirixidos a axentes da Policía Local sobre a atención de casos de violencia de xénero.
Este plan de formación, enmarcado nas actuacións do Pacto de Estado contra a Violencia de Xénero, buscará ofrecer aos axentes "unha formación completa e integral para levar a cabo unha primeira intervención ante situacións de violencia machista".
Os 60 cursos presenciais de 12 horas con 25 prazas dispoñibles cada un celebraranse ata o final de 2019 nun total de 40 concellos de toda Galicia; nas sete cidades organizaranse varias edicións.
Estes cursos serán impartidos por máis de 40 profesionais especializados na formación en igualdade, a avogacía, a psicoloxía e a Policía local, que ofrecerán contidos relacionados coa perspectiva de xénero, os delitos de violencia machista, a atención psicolóxica ás vítimas e a intervención policial nestes casos.
O plan de formación foi presentado pola secretaria xeral de Igualdade, Susana López Abella, e o director xeral de Emerxencias, Santiago Villanueva, quen avanzaron que estes cursos volveranse a convocar en 2020 para chegar á totalidade dos 2.900 axentes do corpo de seguridade que traballan na comunidade autónoma.
Agasp tamén ofrecerá o próximo mes de outubro formación sobre violencia de xénero dirixida aos axentes da Garda Civil e a Policía Nacional destinados en Galicia, o que permitirá alcanzar unha coordinación nas actuacións sobre violencia machista e suporá unha maior sensibilización sobre o tema en todos os corpos de seguridade.
