O presidente da Xunta e líder do PPdeG, Alberto Núñez Feijóo, trasladou este luns a súa condena ante o triplo crime de Valga, que cualificou dunha "aberración". "Todo o noso agarimo á familia das tres mulleres asasinadas. Xa abonda de violencia machista", publicou no seu perfil de Twitter o popular, que se atopa de viaxe oficial en Arxentina.
A súa foi unha das voces da condena unánime que xerou a traxedia na clase política galega. Na mesma liña, en rolda de prensa, o portavoz parlamentario do PPdeG, Pedro Puy, lamentou a "desgraza" de Valga e chamou a deixarse "de bobadas": "É execrable violencia machista". Dito isto, defendeu que "toda a sociedade" debe "traballar arreo" para que as mulleres que poidan ser vítimas de violencia machista teñan "o apoio, a protección e a axuda de todos".
PSDEG. O líder dos socialistas galegos, Gonzalo Caballero, trasladou "toda a condena que merecen os graves asasinatos de Valga". "Recibimos a noticia con fondo pesar pola gravidade do sucedido", sinalou o socialista, quen apuntou que feitos como este evidencian que "a problemática da violencia machista segue existindo".
"Aténtase contra os dereitos e liberdades das mulleres; e (neste caso) contra o dereito á vida das mulleres e de calquera cidadán", aseverou, antes de trasladar "todo o rexeitamento" dos socialistas ante o ocorrido e o seu apoio á familia das mulleres asasinadas.
Gonzalo Caballero: "Aténtase contra os dereitos e liberdades das mulleres"
Tamén a presidenta da Deputación de Pontevedra, Carmela Silva, mostrou a súa "condena, repulsa, e indignación" ante o triplo crime e reclamou un "compromiso contundente de que non se vai pactar" con aqueles que "negan as violencias machistas". "Hoxe algúns irán a Valga e farán declaracións condenando os feminicidios", dixo a socialista, quen engadiu que son "os mesmos que pactan con Vox, con aqueles que negan a violencia machista". "A eles me dirixo para dicirlles que xa está ben. Estamos fartas de hipocrisía".
"Desde a Deputación de Pontevedra queremos estar ao lado de Valga, ao lado da familia de Sandra, Alba, Elena, deses dous nenos, e dicirlle que non hai dereito, que é unha inxustiza, que é insoportable e non hai palabras para poder definir toda esta dor que sentimos", engadiu Silva. A presidenta e o Goberno provincial sumaranse este martes á concentración convocada ás 12.00 pola Subdelegación do Goberno en Pontevedra.
Ademais, desde este luns as bandeiras das sedes da Deputación de Pontevedra na cidade do Lérez e en Vigo ondean a media hasta e a institución adianta a iluminación desas instalacións en cor violeta, con motivo da campaña EmerxenciaFeminista.
BNG. A portavoz nacional do Bloque, Ana Pontón, pediu este luns "máis recursos contra a violencia machista e contra a súa causa última, o sistema patriarcal", tras o triplo asasinato de Valga. "Necesitamos máis recursos para educación e sensibilización para acabar co machismo, non abonda só con destinar recursos ás mulleres que foron vítimas desta violencia", afirmou a nacionalista.
A líder do BNG trasladou a "firme condena" da súa formación ao "triplo feminicidio", xa que "estes feitos non deixan de cabrearnos, arrepiarnos, e indignarnos e poñer ante os nosos ollos a necesidade de acabar co machismo". En paralelo, Pontón tachou de indecente "e politicamente impresentable" que se dea acubillo "a mensaxes e partidos políticos que cuestionan a existencia da violencia machista, como a extrema dereita coa que está a pactar o PP".
A portavoz nacional do Bloque tamén avanzou que "o feminismo galego vai convocar mobilizacións de condena", polo que "é importante que, ante un feito tan grave, a sociedade que defende a democracia, a igualdade e os dereitos das mulleres saia á rúa a dicir que non somos conniventes coa violencia machista".
Ana Pontón: "Necesitamos máis recursos para educación e sensibilización para acabar co machismo"
COMÚN DA ESQUERDA. O Grupo Común da Esquerda tamén condenou o crime. A través da parlamentaria Luca Chao, cualificou de "terrible" un caso que apoia a necesidade de que a violencia machista sexa tratada como "unha cuestión de Estado" que permita poñer "todos os recursos para abordala".
Así, trasladou as condolencias do grupo á familia e achegados das tres vítimas, das cales "dúas nin sequera estarán nas listas oficiais" de casos de violencia machista, segundo dixo Chao, que chamou a participar nas concentracións convocadas polo movemento feminista para o vindeiro venres.
Luca Chao: "A violencia machista debe ser tratada como unha cuestión de Estado que permita poñer todos os recursos para abordala"
Tamén expresou o seu pesar polo sucedido Podemos Galicia, formación integrada en Común da Esquerda e que, a través dun comunicado, apelou a saír "ás rúas para dicirlles aos gobernos que os crimes machistas non se evitan con medidas mornas" senón con políticas "valentes e transformadoras". "O machismo mata, e quen mostre morneza co machismo debe saber que está a apoiar un sistema de valores que se cobra decenas de vidas cada ano", dixo o secretario xeral da formación morada e deputado de Galicia en Común, Antón Gómez-Reino.
GRUPO MIXTO. A deputada do grupo Mixto e integrante de En Marea Paula Verao alertou de que o triplo crime machista de Valga pon de manifesto a necesidade de estar "en alerta feminista". Verao anunciou que En Marea participará na convocatoria de concentracións de repulsa contra a violencia machista.
Paula Verao: "É necesario estar en alerta feminista"
Ademais, apuntou que no actual período de sesións do Parlamento de Galicia, a súa formación presentará iniciativas a favor de reforzar a promoción da igualdade de xénero. Para evitar que siga aumentando "unha lista que non debería existir" como é a de vítimas de violencia machista, Verao solicitou á Xunta que tome medidas que propicien a consecución dunha igualdade real entre homes e mulleres. Así mesmo, reclamou máis fondos para os programas municipais de sensibilización e prevención e medidas contra a precariedade laboral, que afecta especialmente ás mulleres.
