Nove positivos por coronavirus entre os funcionarios dos cárceres galegos

Outros 20 traballadores permanecen illados ao presentar síntomas

Tarefas de desinfección na prisión da Lama, a principios do mes de abril. CEDIDA
photo_camera Tarefas de desinfección na prisión da Lama, a principios do mes de abril. CEDIDA

O sindicato ACAIP-UXT denunciou que nove funcionarios deron positivo por coronavirus nas cárceres galegos, un deles no Centro Penal da Lama, e que outros vinte atópanse en illamento por ter síntomas ou estar "en contacto estreito" cos infectados.

Con estes datos na man, ACAIP-UXT remitiu un escrito ao departamento de Sanidade na Xunta de Galicia para reclamar medidas de prevención e protección dos traballadores dos centros penais que hai en Galicia.

Na súa petición solicitan que se fagan test serolóxicos de detección da Covid-19 que discriminen a IgM e IgG e que determinen "con seguridade" o estado de saúde dos empregados públicos.

Coñecer "con certeza" a incidencia "real" do coronavirus nos cárceres galegos, defende este sindicato, é "vital" para que os funcionarios poidan realizar "coas debidas garantías" o seu traballo como servizo esencial.

A prioridade destes traballadores á hora de someterse a estas probas é "incuestionable", segundo ACAIP-UXT, xa que considera que o seu ámbito de traballo é "especialmente sensible" a esta urxencia sanitaria.

Factores como o confinamento ao que están sometido o colectivo de prisións ou a protección da poboación reclusa, moita dela inmunodeprimida, fan "imprescindible", engaden os traballadores, o control de contaxio por COVID-19 neste colectivo.

O escrito, ademais da Xunta, foi remitido á Delegación do Goberno en Galicia e á Secretaría Xeral de Institucións Penais, aínda que o sindicato recorda que é a administración autonómica quen asumiu a "obrigación" de testar á poboación.

Comentarios