PPdeG e PSdeG rexeitaron este xoves a solicitude dun pleno de carácter extraordinario proposto por En Marea no que este grupo pedía a comparecencia do presidente da Xunta para analizar as responsabilidades e actuacións a emprender tras o accidente no festival do Marisquiño que se saldou con máis de catrocentos feridos de diferente consideración.
A confluencia que lidera Luís Villares demandaba, así mesmo, unha comisión de investigación para determinar as causas e dirimir responsabilidades polo derrube dunha pasarela nese festival de música e deporte o 12 de agosto, así como a intervención do conselleiro de Sanidade, Jesús Vázquez Almuiña, pola suposta falta dun reforzo do servizo de Urxencias no hospital Álvaro Cunqueiro nas xornadas posteriores.
"ENCÓBRENSE". Villares lamentou que se perdeu esta "oportunidade" de debate posto que entende que tal actitude non axuda "a aprender do sucedido nin a sentar as bases" para que non volva ocorrer, posto que polo momento só ve un lume cruzado de acusacións.
Do Concello de Vigo á Xunta e Autoridade Portuaria, enumerou na súa comparecencia posterior ante a prensa, e do ente portuario á súa vez contra os organizadores da mencionada cita festiva, razóns polas que En Marea expuxo un "foro de investigación" ante o cal "PP e PSOE péchanse en banda, dificultando que o conxunto da cidadanía" saiba a verdade, queixouse.
A continuación, citou as respostas que van quedar no aire: cal debe ser un uso seguro dos espazos públicos, particularmente dos portuarios; e a reforma da Lei de Espectáculos Públicos que naceu "deficitaria", como se acaba de ver, dixo, no "primeiro conflito serio que hai coa aplicación da norma" impulsada polo PP.
"Encóbrense para evitar dar explicacións", asegurou con contundencia.
E Luís Villares vaticinou que volverán intentar buscar explicacións, de carácter verosímil, porque a sociedade está "avergonzada", valéndose dun cualificativo empregado ante este caso polo propio Alberto Núñez Feijóo.
"As vítimas merecen explicación, saber a quen lle poden reclamar polo dano causado", e os habitantes de Galicia en xeral saber que ten que mellorar para gozar en condicións de seguridade. Por todo iso, "o que hoxe vimos é absolutamente inaceptable", rematou.
BNG. Nun sentido similar pronunciouse a portavoz do BNG, Ana Pontón, que, na súa intervención ante os medios, comentou que fallaron "toda a lexislación" e tamén "todos os controis" nun evento de grandes características e, a tenor do xa pasado, afirmou que non tratar o asunto no hemiciclo no xeito oportuno é "de falta de mínima humildade e de respecto", á democracia inclusive, precisou.
"Lamento que non teñamos posibilidade, é unha situación moi, moi grave, que puido ter consecuencias moitísimo maiores", espetou, e trouxo a colación o precedente do accidente do tren Alvia no barrio de Angrois, pois aí xa se viu o "afán de colaboración", ironizou.
