O Ministerio Público de Pontevedra presentou no xulgado do Mercantil da cidade do Lérez a anunciada demanda de xuízo ordinario en exercicio de acción colectiva en defensa dos usuarios da AP-9, que inclúe a restitución das cantidades abonadas polos condutores en concepto de peaxes durante os máis de 3 anos de obras na ponte de Rande.
A Fiscalía sinala que Audasa seguiu cobrando idénticas tarifas a pesar das "restricións permanente do tráfico". Durante as obras, a entidade mantivo invariables as tarifas a pesar das restricións permanentes de tráfico.
A demanda insiste en que, durante o período indicado, “o tráfico viuse permanentemente afectado no tramo da ponte de Rande, dado que a redución do número de carrís en uso e a redución dos límites de velocidade, ademais das sucesivas tarefas de execución das obras, implicaron, en todo momento e aínda que puntualmente non houbese acumulación de vehículos, que a fluidez da circulación diminuíse, sendo preciso empregar máis tempo do habitual para percorrer a mesma distancia de autoestrada”.
"Non só se mantivo o cobro íntegro da peaxe, senón que incluso se incrementou a partir do 1 de xaneiro"
Por estas razóns, “todos os vehículos que circularon nese tramo entre as datas indicadas se viron afectados, en canto recibiron un servizo da autoestrada con insuficientes condicións de fluidez e seguridade”.
"As mesmas circunstancias relatadas favoreceron a aparición de embotellamentos e retencións, os cales se sucederon de forma constante e cotiá", continúa.
A pesar destas circunstancias, a Fiscalía recorda que "non só se mantivo o cobro íntegro da peaxe en todo momento, a pesar das afectacións do tráfico, senón que se incrementou a partir do día 1 de xaneiro de 2018, tras unha inauguración das obras que se realizou o 30 de decembro de 2017 aínda cando se continuaron realizando traballos similares na calzada con posterioridade a esa data”.
