Ignacio Oriol, o principal benefactor da Orde e Mandato de San Miguel Arcanxo, coñecida como os Miguelianos, recoñeceu este venres que entregou "importantes" cantidades de diñeiro, que cifrou en máis dun millón de euros.
Na undécima sesión do xuízo que se segue en Pontevedra contra o fundador desta suposta seita, Miguel Rosendo da Silva, Oriol explicou que este diñeiro se destinaba a dar "consistencia" ao funcionamento da orde e constituírse como asociación de fieis.
Tras destacar que mantén a súa "absoluta confianza" en Miguel Rosendo, o benefactor dos Miguelianos asegurou que "nunca" tivo coñecemento dos abusos sexuais que denunciaron varias das integrantes desta congregación.
"Non sospeitei absolutamente nada de tema sexual, pero si sospeitei que aquí se estaba montando algo contra nós e non sei por que", explicou ante o tribunal, xa que "meses antes de que" comezasen as denuncias públicas de antigos membros decatouse de "rumores" sobre posibles irregularidades.
Segundo relatou, un antigo membro de Orde e Mandato reuniuse con el en Madrid e díxolle que "todo o que contaban de Miguel era verdade", chegando incluso a intermediar con autoridades eclesiásticas e avogados, "pero me dei conta que me enganaron", dixo.
Na súa declaración explicou que das relacións sexuais tivo "noticias pola prensa" e iso lle "entristece" pois estivo durante anos achegando diñeiro "e ninguén me dicía absolutamente nada", ata que comezaron a publicarse informacións "de que Rosendo tiña relacións con non se cantos e que eu era satánico".
Ignacio Oriol, que asegurou que estivo varias veces na sede da orde, situada en Santa María de Oia, reiterou que os seus integrantes tiñan "liberdade de movemento total" e negou que vivisen nunha situación de sometemento.
Ademais, mantivo que alí se vivía nunha "contorna alegre" e que Miguel Rosendo tiña coas mulleres consagradas que actuaban como os seus "bastóns" unha relación "preciosa", de respecto "e proximidade".
