O xuíz decretou prisión provisional, comunicada e sen fianza, para os dous detidos pola Policía Nacional como investigados polos supostos abusos sexuais dos que foi vítima unha moza de 25 anos a pasada fin de semana na cidade de Lugo. O maxistrado tamén lles prohibiu a ambos os investigados, de nacionalidade romanesa, comunicarse coa denunciante.
Os dous homes, de 38 e 43 anos, foron arrestados nas últimas horas como investigados por unha suposta agresión sexual a unha moza lucense, de 25 anos, que se espertou nunha pensión da cidade, cun individuo ao que "non coñecía" e sen acordarse "de nada" do sucedido a noite anterior. Fontes policiais informaron de que a moza presentou denuncia na Comisaría Provincial o sábado pola mañá.
No seu testemuño, a suposta vítima informou aos axentes que a atenderon de que saíu tomar algo cunha amiga, da que se separou nun momento determinado da noite, e perdeu a noción da realidade ata que se espertou, á mañá seguinte, nunha pensión da cidade de Lugo cun home ao que non coñecía. Segundo a propia denuncia, a moza separouse da súa amiga ao redor das tres da madrugada, cando saíu do pub no que ambas estaban a tomar algo, e non recorda nada do sucedido desde entón, ata que se espertou ao redor das once da mañá.
Ambos os detidos pasaron a disposición do xulgado de garda este luns pola tarde.
A investigación policial céntrase en determinar que sucedeu nesas horas que a moza ten borradas da súa memoria, así como en concretar se os sospeitosos botáronlle algo na bebida para abusar dela. Á espera de novas dilixencias por parte dos investigadores, o caso quedou en mans do xulgado de instrución número 3 de Lugo.
